S'il em puet venir au deseure,
Il les destraira a une eure.
Or ont autel paor de li
Qu'ele ne velle faire ausi.
Por çou ont esgardé entr'aus,
Ains que plus en soit fait de maus,
Que par ii. homes sera fait,
Qui desrainier le puet, si l'ait.
Mais li pucele a grant anui:
Cil ne veut respondre nului,
Ne home respondre ne daigne
Fors le roi Artu de Bertaine.
Par gentelise et par son droit
Dist q'autrui respondre ne doit.
Or vos mande por Diu äie
Cele qi mout est esbahie.
Sire gantius, li rois des rois,
En cui cort sont les bones lois
Et toutes les bones coustumes,
Et les mauvaises en escumes,
Ja vos proie toute se cors,
Por Diu, que li faciés secors.
Car se vous n'em prendés conroi,
N'avra garant contre le roi,
Ne soit tornee en descepline,
Ja n'iert contesse ne roiine.
De lonc vous a reqis ici
Que vos aiiés de li merci,
Que li haus pere le vos mire,
Qui de tous les segnors est sire.“
Endementiers que cil lisoit,
La pucele forment pleuroit,
De ses vairs iex rians et biaus
Ceurent les larmes a ruisiaus,
Aval li descendent de haut
Sor l'entrepan de son blïaut.
Li rois Artus l'a regardee:
Quant il le vit si esploree,
Si l'apiela: „Suer, douce amie,
Biele,“ dist il, „ne plorés mie,
Car vostre dame iert secorue.